فاٹا انضمام پر افغانستان کیجانب سے مشکلات آ سکتی ہیں

جمعیت علمائے اسلام (ف) کے سربراہ مولانا فضل الرحمٰن کا کہنا ہے کہ فاٹا کا انضمام اسمبلی نے خود نہیں کیا بلکہ اس سے کرایا گیا ہے۔ اسلام آباد میں پریس کانفرنس کرتے ہوئے مولانا فضل الرحمٰن نے کہا کہ فاٹا کے معاملہ پر جو رویہ اختیار کیا گیا اس نے پاکستان کے مستقبل پر انتہائی منفی اثرات مرتب کئے ہیں، حکومت اور وزراء اعتراف کر چکے ہیں کہ فاٹا انضمام ہماری رائے اور حقائق کے خلاف ہے اور ان کا کہنا ہے کہ زمینی حقائق وہی ہیں جو فضل الرحمٰن کہتا آ رہا ہے۔ انہوں نے کہا کہ وزیراعظم شاہد خاقان عباسی اور وزیر سیفران عبدالقادر بلوچ نے فاٹا انضمام نہ ہونے کی یقین دہانی کرائی تھی جبکہ رواج ایکٹ پر کارروائی روکنے کی بھی یقین دہانی کرائی گئی تھی، ہم نے سپریم کورٹ اور پشاور ہائیکورٹ کی توسیع پر بھی اتفاق رائے نہیں کیا تھا۔ ان کا کہنا تھا کہ میں نے بند کمروں اور کھلے عام بھی اپنا موقف سب کے سامنے کہا، آرمی چیف جنرل قمر جاوید باوجوہ اور وزیراعظم سے کہا کہ افغانستان کی جانب سے مشکلات آ سکتی ہیں اور فاٹا کے انضمام پر افغانستان کا 24 گھنٹے میں ردعمل آیا۔ مولانا فضل الرحمٰن نے کہا کہ ہم ابھی مشرقی تنازعات سے نکلے نہیں اور مغربی تنازعات کو دعوت دیدی ہے، اگر آنے والے حالات میں کوئی ایندھن بنے گا تو وہ صرف قبائل کے عوام ہوں گے، کیا قبائل کے عوام صرف اس مقصد کیلئے بنے ہیں۔

ان کا کہنا تھا کہ ہم اب بھی سمجھتے ہیں کہ فاٹا کے عوام سے رائے لی جائے، یہاں 120 دن دھرنا دیا سب نے برداشت کیا، لیکن جب جے یو آئی (ف) کے کارکنوں نے اپنا احتجاج ریکارڈ کرایا تو ان پر لاٹھیاں برسائی گئیں، جبکہ اب میں اپنا معاملہ قبائل جرگے کے سامنے رکھوں گا۔ انہوں نے کہا کہ صدر پاکستان ممنون حسین کو بھی ان تمام حقائق کا علم ہونا چاہیئے، اگر آخری دستخط ان کی ذمہ داری ہے تو وہ اسے روک دیں، کیونکہ عوامی ردعمل آنا شروع ہو گیا ہے جو بڑھتا چلا جائے گا، جبکہ عوامی ردعمل کا وزیراعظم کو بھی اندازہ ہے۔ سربراہ جمعیت علمائے اسلام (ف) کا کہنا تھا کہ فاٹا کا انضمام اسمبلی نے کیا نہیں اس سے کروایا گیا ہے، یہ کام پارلیمنٹ کی گردن مروڑنے والی قوت نے کروایا ہے، ہم کشمیریوں کیلئے حق مانگتے ہیں لیکن اپنے لوگوں کو حق نہیں دے سکتے۔ انہوں نے سوال اٹھایا کہ فاٹا اگر پسماندہ ہے تو پنجاب کا جنوبی علاقہ پسماندگی نہیں؟ پنجاب میں پسماندگی کم کرنے کیلئے الگ صوبہ مانگتے ہیں اور فاٹا کی پسماندگی دور کرنے کیلئے اسے ضم کیا جا رہا ہے، تاہم ہم فاٹا کے حقوق کی جنگ لڑیں گے۔ نگراں وزیراعظم کی نامزدگی سے متعلق مولانا فضل الرحمٰن کا کہنا تھا کہ جسٹس ریٹائرڈ ناصرالملک نیک نام آدمی ہیں، ہم ان کی نامزدگی کی حمایت کرتے ہیں۔

یہ بھی پڑھیں

پیٹرولیم ڈویژن نے گیس کی قیمتوں میں اضافے کی سمری تیار کرلی

پیٹرولیم ڈویژن نے گیس کی قیمتوں میں اضافے کی سمری تیار کرلی

اسلام آباد: ماہانہ 50 مکعب میٹر گیس استعمال پر فی یونٹ نرخ 63 روپے سے …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے